ఏ నిముషానికి ఏమి జరుగునో....

'సెట్లో చారిగారిని చూస్తే ముద్దోచ్చేస్తుందీ' అన్నాను.
'నాక్కూడా...' అన్నాడు మా మార్కెటింగ్ మేనేజర్.
'అరగంట స్లాట్ యాభై వేలు. పదమూడు స్లాట్స్‌కీ నెట్ క్యాష్ ఇచ్చేసాడు. ఇప్పుడీయన్ని ఎత్తుకొని సెట్ చుట్టూ తిప్పూ అన్నా తిప్పుతా' అన్నాడాయన తన్మయంగా.
వారఫలాల కోసం వేసిన సెట్ అదిరింది. వెనక్కాల ఏడుకొండలవాడి విగ్రహం, ఆయన అభయ హస్తం సరిగ్గా తన నెత్తిదగ్గర రావాలని చారీగారు కోరినట్లు ఆర్ట్ డైరక్టరు చారి నెత్తి పైన వెంకన్న చేయి పెట్టేసాడు.
'మన చీఫ్ ఒకసారి వచ్చి చూస్తానన్నారు. ఆయన రాగానే మొదలు పెట్టేద్దాం ' అన్నాడు మా.మే.(మార్కెటింగ్ మేనేజర్).
'చారిగారు సినిమా యాక్టరా.. అన్ని యాంగిల్సూ చూపించేందుకు, సింగిల్ కేం చాలు అని మేం మొత్తుకొన్నా వినకుండా మా మా.మే. త్రీ కేం సెట్టప్పు స్వయంగా దగ్గరుండి అరెంజ్ చేయించాడు. కూర్చున్న వినాయకుడిలా వున్న చారిని అన్ని కేముల్లో క్లొజులూ, వైడ్లూ తీసి చూసి హమ్మయ్యా అని రెడీగా వున్నారు కేమేరామెన్లు.
'పది నిముషాల్లో దుర్ముహూర్తం, మొదలెట్టండో..' అని చారి వెంటాడి వేధిస్తున్నా.. విననట్లు చీఫ్ ఎడిటర్ కోసం అందరం స్టుడియోలో ఎదురుచూస్తున్నాం.
సరిగ్గా పదే పది నిముషాల తర్వాత చీఫ్ వచ్చారు. చారిగారు వెంటనే గుప్పెడు మట్టి, ఒక ఆకుపచ్చ రాతి వుంగరం భక్తిగా ఆయన చేతుల్లో పెట్టాడు.
'అది త్రివేణీ సంగమంలో తీసిన మట్టి, ఏ టెన్షనూ దగ్గరకు రానివ్వదు. ఈ ఉంగరం ప్రత్యేకంగా చెన్నకేశవుడి పాదాల దగ్గరనుంచి తెచ్చాను. నాకీ ప్రొగ్రాం దయచేయించి నన్నూ నా శక్తినీ ఈ ప్రపంచానికి చూపిస్తున్నందుకు మీకు సర్వదా రుణపడి వుంటానూ' అన్నాడు చారి చీఫ్ ఎడిటర్ పట్ల కృతజ్ఞతతో కరిగి నీరైపోతూ.
అందరి ముందూ అందుకుంటే బావుండదని కాస్త ఇబ్బందిగానూ, పోన్లే మట్టీ రాయే కదా అని అనుకొనో, కాస్త నవ్వు మొహంగా అవి అందుకొంటూ...
'మీరు చెప్పిన ప్రతి అక్షరం నిజమవుతుందాన్నారు చారిగారూ, మాట నిలబెట్టుకోవాలి' అన్నాడు మా చీఫ్.
'గ్రహాలు నేను ఆగూ అంటే ఆగూతై, భూత భవిష్యత్ వర్తమానాలు నా కళ్ళముందునుంచే కదులుతాయి' అన్నాడు చారి.
సెట్లో చారి గారి విగ్రహం చక్కగా సూటయ్యింది.
'ఏమిటీ ఆలస్యం మొదలు పెట్టండి ' అన్నాడు చీఫ్.
చారి ఆయన్ని చేయెత్తి ఆశీర్వదిస్తూ....
'మీ చానలూ మీరూ ఉన్నత స్థితిలోకి వెళతారు ' అంటున్నాడు.. అంతలో కేమేరాకి అడ్డం రాకుండా ఉండేందుకు చీఫ్ వెనక్కి అడుగు వేయటం, కేమేరా వైర్లు కాలికి చుట్టుకొని.. వెల్లికలా...
ఎందుకులేండి.. చారి గారి అదృష్టం బావు లేడు.
ప్రొగ్రాం కేన్సిల్.
అడ్వాన్సుగా ఇచ్చిన డబ్బు తిరిగి ఇమ్మని మా మా.మే చుట్టూ తిరుగుతున్నాడిప్పుడు.
అయనకు మంచిరోజులెప్పుడో పాపం!